2009-02-16 ( 玩大價股嘥時間!)

- 日本銀行系統响過去用咗十五年時間累積利潤，才能填補資產泡沫破滅後遺留下來嘅壞賬，至於美資銀行需時幾耐？愈來愈多分析估計美國同英國未來經濟係大L形、歐洲經濟係W形；至於發展中國家應係U形，其中又以中國情況最好。

- 過去日子裏，我老曹一直提醒讀者避開銀行股同地產股，只用小量資金（例如全部投資資金30％）專敲二線股，以保持高度警覺性，以便响大市一旦轉勢時做春江鴨。

- 2009年股市大方向嘅睇法不變（仍係熊市二期）。

- 今年1月7日恒指高位已被證實係今年高位，至於1月21日恒指低點12439點係咪支持位？好快就清楚。

- 依家玩嘅遊戲係找尋熊市二期內嘅大反彈，因此如非資深及有獨立思考嘅投資者，都係以唔沾手股票為佳。响通縮期最後贏家係現金持有者！

- 1月13日至今，美國標準樓按利率由5.04厘上升到5.51厘，升咗10％（今年內聯儲局已購入920億美元樓按債券，去阻止樓按利率上升）。利率上升嘅理由係因為政府將面對2萬億美元短缺，聯儲局喺今年內必須發行新債2萬億美元，上述因素正將政府長債息率推高。

- 石油業嘅Supply Destruction已開始。例如加拿大油砂嘅生產成本係90美元一桶、深海石油生產成本60美元一桶，今天油價水平引發由加拿大到中東油公司停產（OPEC已減產四百二十萬桶一天，並計劃再減產四百萬桶一天，仍無法阻止油價下跌）。

- 40美元以下一桶油價正正產生「供應破壞」──因油價太低，部分產油公司被迫增產去維持利潤，令高生產成本嘅油公司須減產或停產，部分甚至倒閉，直到供求重新平衡為止。

- 估計今年全球用糖一億六千二百一十萬噸，由於供應不足，「製甜」嘅工業股係咪值得看好?!

- 今年1月中國新貸款數字大升。响政府壓力下，內地銀行為支持一個4萬億人民幣嘅刺激經濟方案，令今年1月貸款上升速度達18.8%。到底能否扭轉通縮壓力，定係一如美林香港分析員J. J. Bond所估計，未來各中資銀行呆壞賬大增？日後才知曉。

- 恒指在10600至15800點上落嘅同時，亦有唔少二線股逆流而上；反之銀行股卻一再創新低。可惜散戶對銀行股嘅愛之深已到咗無法自拔嘅階段。

- 如果你缺乏流動資金，銀行可借錢畀你度過危機，此乃流動性問題。如你嘅生產活動已停止產生盈利，咁銀行再借錢畀你，亦只會令你更泥足深陷。

- 1981年，月租2萬元一千呎嘅住宅市值110萬元，因為當年最優惠貸款利率22厘；到今天，同樣住宅單位月租亦只有25000元，但住宅市值已升至 400幾萬元。點解二十八年內租金只上升25％，而樓價卻上升445％？皆因利率喺過去二十八年大幅回落。如果冇利率回落嘅因素，1981年市值110萬 元嘅住宅今天市值將低於137萬元（因折舊因素）。1981至2008年上半年，本港樓價升幅中約有420％來自信貸膨脹，可惜呢個因素由2008年下半 年起告一段落。當存款利率降至0.25厘後，未來仲有幾多減息空間（港元利率已降至0.01厘）：去年下半年起樓價開始回落，主因係開始抵銷未來利率上升 嘅因素。因此，長遠而言，地產股已失去投資價值。

-換言之，八十年代香港經濟轉型後，最賺錢兩大行業──地產及金融皆面對冬季，未來恒生指數牛市點樣產生 ?! 此乃最簡單的「論勢」。

- 去年10月27日起已進入二線股時間，以過去三個多月為例，升幅超過100％嘅二線股多不勝數，你有冇捉住其中一隻，做一個Secton Hunter？

- 今年我老曹又向大家推介建築股，因最近建築合約價上升50-70%，同時油價大幅回落，即未來建築合約可恢復獲利，提供另一個獲利機會。

- 黃金係用嚟炒，唔係買嚟揸，冇人會揸金發達。

- 去年金價以歐羅計升9％、以英鎊計升45％、以加元計升31％，一旦上述貨幣止跌回升，足可引發另一次黃金拋售潮。