投票結果 (人民幣會否大幅貶值?)

會 2 (14%)
唔會 12 (85%)

大多數讀者都唔認為會大幅貶值。

今日曹sir (2008-12-31)

今日係2008年最後一日，祝福各位新年進步！

- 12月30日，周二。恒生指數跌92.98，收14235.50；成交263.79億元。12月期指升58點，收14376點；1月期指跌67點，收14244點。除夕股市十分混亂，繼續個別發展。

- 中美利差存在，令資金流向中國，一旦人民幣完成大幅減息，小心資金由淨流入變成淨流出。

- 展望2009年上半年，相信美元滙價將繼續走強，令人民幣兌其他非美元貨幣進一步升值。

- 全球去槓桿化操作令美元保持強勢，直到2009年下半年美元滙價才會轉弱。

- 美國債市可能出現倒V形走勢，即2008年下半年急升，明年上半年急跌。

- 前總統克仔嘅經濟顧問Martin N. Baily認為，美國已到咗十分危險嘅水平，未來問題唔係經濟幾時復甦，而係2009年美國會否陷入蕭條（因2008年GDP已出現負增長）。

- 未來大趨勢將係「中國雄起」。

- 2008年開始中國經濟進入轉型期，估計需時三年，即2010年底前中國經濟應進入另一上升周期；

- 中國經濟轉型嘅最大阻力，係中國現今仍然國富民窮。

- 如要進入內需帶動型經濟，必須將依家嘅國富民窮情況扭轉為國窮民富，例如全面降低稅收、提供社會福利、努力還富於民，不然內需型經濟無法喺中國境內出現。

- 事實上，恒指跌到10月27日喺10678點獲支持，完成量度跌幅，11月份出現一浪高於一浪，即短期可睇好，估計高潮喺2009年年初。上述分析乃理性預期，並非預測。

- 2007年起西方經濟已完成第一衰敗循環周期，東方經濟亦完成第一個興盛循環周期，步入第二個大循環周期。西方經濟將迅速下滑、東方經濟將迅速冒起。作為投資者，宜向東望，而非向西走……。

- 依家一部分劣質企業倒閉後，生產資源集中响一些優質企業，便有更大嘅議價能力，一雙鞋售價又升上12美元；加上原材料價格大幅下調，對生存下來嘅優質企業 而言，呢次倒閉潮反而係利好因素！嗰D抓技改、重研發、做品牌嘅企業不但未受倒閉潮影響，反而壯大起來。《人民日報》認為，只要捱過2009年第一季，東 莞便有更美好嘅明天！

- 從在港上市嘅工業股股價表現睇，正是春江水暖鴨先知。資本主義制度下，汰弱留強無法避免。我老曹12月已開始推介各工業股矣。

今日曹sir (2008-12-30)

- 12月29日，周一。恒生指數升144.34，收14328.28；成交219.5億元。12月期指升198點，收14318點。股市繼續個別發展。(低水10點，反映唔到後市。成交真係好低。股資者都淡出了？)

- John Hussman博士估計，今年10月開始聯儲局透過寬鬆貨幣政策，逼令美元滙價及利率下跌，美國債券市值則上升26％。

- 呢類人為性操控可維持幾耐？結果只有兩個：
一、如美元滙價穩定，美國債券將大跌；
二、如美債穩定，美元滙價將大跌；兩者唔可能並存。

- 我老曹傾向相信係前者而非後者，即美元滙價2009年將穩定下來，美國債券價格則大跌。

- 歐盟則威脅向WTO投訴。睇嚟唔使幾耐聯儲局再不能撳住美元滙價及利率，如此一來，美債有可能响2009年大跌！

- 以1930年代為例，大跌市後亦有一段日子係二線股表現較大企業出色。通常喺衰退中期（即熊市二期），二線股便會有出色表現；但熊市一期及熊市三期，二線股跌幅則較大。

- 2007至08年過去呢十二個月內，細價股跌幅太大，令未來下跌風險大大收窄，例如電子股可實行「Buy the Dips」（過度被拋售者可吸納）。地產股短期痛苦、長期獲利，只要有耐性，總可等到美好明天。至於能源股同資源股，便「Buy Vale」（偏低時才吸納）。(應該所有股票都係低買高賣吧？)

- 瑞銀估計2009年金價可能見300美元一盎斯，主要係各國央行積極拋售黃金以獲取資金，去修復各大銀行嘅資產負債表。

- 換言之，自10月份起各位所睇到嘅歐洲銀行資產負債表並未充分反映真實一面。上述決定令全球股市11月起回升，但同時延長金融股嘅調整期（因為衰嘢可以分階段入賬）；銀行股喺可見將來仍缺乏吸引力。

- 最近三天內地A股有二十八家公司限售股面臨解禁，其中二十二家就喺本周一，周二五家、周三一家。短期A股面對嘅大小非減持壓力好大。

- 投資並冇長線、短線之分，喺唔適當時刻做長線投資，係絕對錯誤嘅決定！投資應論勢而行及重視策略運用，與長線、短線無關。

- 內地專家認為，2009年A股係「猴市」，上蹦下跳，相當於香港1982年12月至84年7月股市炒上炒落。

今日曹sir (2008-12-29)

- 12月28日，周日。2008年仲有三個交易天就結束。由去年11月至今年聖誕節前，全球股票市場失去32萬億美元市值。

- 如今十年期國庫券孳息只有2.17厘；反之，道指息率卻有3.64厘. (因為股票風險較高。)

- 九十年代美股牛市由科技股引發，2003年牛市由商品價格上升引發，下一個牛市由邊個行業引發？目前仍無頭緒。

- 2008年係持盈保泰年、2009年係低買高賣年，愈接近10600點愈可買，愈接近250天移動平均線愈要賣，利用波幅去賺錢。

- 呢次衰退呈U形嘅機會甚大，亦有可能係L形或者W形，但一定唔係V形（1981至84年香港嗰次衰退就係W形，1997至2003年上次衰退亦係W形）。 (V同W，要事後先知。重有，V又要V幾耐？個人認為所謂V形W形，可以不理。)

- 展望2009年，ARM因唔少樓按首三年低息供款期結束，令供樓利息一下子急升，我老曹擔心ARM市場將出問題。 (WIKI)

-2009年1月22日奧巴馬正式上台，但可能係最後一個好消息（1月效應），之後股市又會再回落。(Sell in January?)

- 美國M2過去三個月以年率19％嘅速度上升，或每天110億美元，上述係令國庫券價格大升、息率大跌嘅理由。

- 美國11月份新屋銷售較10月份下降2.9％，較估計嘅下跌4.2％為好；新屋銷售較去年11月同期下跌35.2％，為1991年1月以來最差。

- 2008年美國聖誕節銷售較2007年同期減少4％，根據萬事達卡計算係2002年以來最差嘅一年。其中女性時裝減少23％、男性少減14％、電子及電器產品少減27％；網上購物好DD，只減少2.3％（上述跌幅同聖誕節前嘅惡劣天氣有關）。(網上購物應該係未來幾年幾重要，亞洲地區既網上購物唔流行，反而可能係重要商機！)

- 特區政府以為向深圳市民開放便可吸引深圳人來港消費，深圳各大百貨商場不但輕輕將之化解，反而吸引更多港人去深圳消費。(暫時對此消息有保留。)

- 代表美國商業樓如商場及寫字樓嘅Spxcus指數已出現令人擔心嘅走勢，恐怕2009年美國商業樓價同商場售價均大幅回落。另一指數Reits & Fixed Income Indices and Funds亦令人擔心）。(樓市下調週期由住宅開始，到商場及寫字樓樓價下跌，應該步入尾聲。)

- 2009年奧巴馬上台亦計劃大搞基建，中國政府亦已宣布大搞基建，連香港特區政府亦大搞基建。未來建築股有冇前途?! (建築股類如生產建築用機械既股份，會唔會得益？)

- 2009年中國政府可能共購入一百萬噸鋁、三十萬噸鋅……政府正趁資產價格便宜增加存量。

- 擔心明年1月債券市場將大跌！CRB商品指數7月至今嘅下降通道仍十分良好（已回落55％），短期或有反彈。

- 2009年通脹唔似可以回升，少數技術上表現較好嘅項目有黃金，金價可能在轉勢。踏入12月美元滙價急跌，理由係12月8日聯儲局宣布採取量化寬鬆貨幣政策【圖】。

- 2009年唔係冇搵錢機會，而係必須充分掌握風險回報率，即Risk / Reward，股市嚴重偏低時可以博，一旦重返合理水平便獲利回吐（當RSI與股價出現背馳時可博，愈接近250天線愈唔好博）

今日曹sir (2008-12-24)

- 今天恒指又跌401.6，收14220.79；成交319億元。12月期指跌488點，收14201點；1月期指跌490點，收14190點低水，聖誕前夕睇嚟股市凶多吉少。(尋日曹sir應為可以升，不過最終都要跌！所以期指係唔係反映後市，真係好難講既~)

- 投資者不會忘記2008年，情況有如1974年、1982年或1998年及2003年。最惡劣日子係咪已過去？信用卡貸款及其他商業貸款仍然係計時炸彈，相信金融股（或銀行股）仍未見底。

- 美元利率已回落至0.25厘，令資金無法呆在銀行，係今年11月起股市進入熊市二期嘅另一理由。

- 至於經濟前景展望，响美國樓價未見底前係無法復甦（日本及香港過去早已證明呢點），如樓價唔止跌回升，銀行係無法增加借貸（因為磚頭乃最佳抵押品）；冇信貸膨脹，經濟好極有個譜。

- 中國三個月內第五次減息，依家一年期存款利率已降至2.25厘，相信仍有減息空間。皇家蘇格蘭銀行估計，明年中國GDP增長率只有5％。上述一切都話畀大家知，2009年經濟環境仍在轉壞。

- 今年12月13日Pomboy接受《巴隆氏》訪問，佢認為，依家係美國經濟衰退嘅「初階」，聯儲局仍努力推人們去冒險，透過零利率政策逼人們購入15厘息以上嘅垃圾債券或8.5厘息投資級債券。隨着去槓桿化發展落去，呢D債券發行機構嘅還款能力令人質疑。

- 明年投資者希望賺取10％回報亦唔容易，如美元滙價轉弱，擔心美債孳息率將止跌回升，引發美債下跌！

- 擔心呢次美國經濟進入一浪接一浪回落而非周期性調整（Secular decline, not cyclical）。

- 應付次按危機嘅正確態度係鼓勵儲蓄，過幾年緊日子，而非刺激消費，令衰退沒完沒了。銀行必須重建資本，金融市場必須重建信用

- 今天「政治正確」嘅政策往往「經濟錯誤」，透過印刷鈔票刺激經濟，或遲或早令債券泡沫爆破，到時股市將進入熊市三期。

- 今年11月起熊市二期出現嘅理由，係用傳統計算法（例如O），現水平股票十分有吸引力；但如從去槓桿化角度睇，企業純利喺2009及2010年仍將萎縮， 今天認為有吸引力嘅股價，如以2009或2010年純利計，便變成毫無吸引力。此乃熊市必須經歷一期、二期及三期嘅理由。

- 商品價格今年下半年才開始大幅回落，但跌幅極急，或有反彈，大方向仍係向下。

今日曹sir (2008-12-23)

- 12月22日，周一。恒生指數跌505.12，收14622.39；成交364億元。

- 今天12月期指跌306點，收14689點，高水，代表周二港股有條件上升。

- 今年珠三角工廠出現「大生」（有人賺大錢）及「大死」（有人蝕大本），出現「西瓜靠大邊」嘅情況（大廠因訂單充足，受惠於原材料跌價或日圓升值利潤急升；細廠因訂單不足，只有關門大吉）。(聯想 同 Foxconn 都跌到好低，但佢兩個都有國際品牌，應該可以反彈。 個人較喜歡聯想。)

- 類似1973年股市嘅情況，相信將在今年重演。大部分投資者開始對股市失去信心而退出，理由係2007-08年過去十二個月內，唔少投資者何止燒傷手指咁簡單？好多曾令人充滿信心嘅大企業、大機構，居然可以一夜間破產或消失。

- 2007年10月高點要幾耐才打破？恐怕係十年八載後嘅事，因為去年8月至10月恒指由20000點升上32000點，背後原因係謠傳港股直通車一個十分唔實在嘅理由。

- 明年有冇1月效應？歷史告訴我地，每年11月、12月同1月都係股票市場最易上升嘅月份，所以有「5月出貨、10月入貨」之說。

- 在恒生指數未低於50天移動平均線之前，我老曹傾向相信明年有1月效應。

- 明年美國將進入零利率時代（Zero Interest Rate Policy，簡稱ZIRP），上述策略九十年代日本曾經採用並證明失敗；點解在日本失敗嘅貨幣政策，在美國可以成功？

- 所謂加息減息，其實只係「打劫紅毛鬼、進貢法蘭西」而已。

- 今天借大錢者係大戶，存錢者反而係普通人，減息乃典型「劫貧濟富」行為，絕對唔公平。(但係，當窮人佔比例愈多，佢地就愈惡。)

- 美國係低儲蓄率民族，零利率計劃如令外資放棄持有美債，將引爆另一泡沫。(中國都話唔會無條件買美債.....)

- 2006年最先爆破嘅泡沫係樓市，然後係股市，今年係金價，最後擔心係債市。

- 2009年嘅優勢係，股市經過2007-08年十二個月下跌，恒指在10月27日10676點水平已極度超賣，來自250天線嘅「拉力」令股市應有一段小陽春。

- 不過，上述暗湧只能浮起舢舨仔，但浮唔起航空母艦，因為市場資金供應仍在減少，企業獲利率繼續下滑。

- 未來形勢係：一、國際商品價格暴跌，令生產商手上存貨只有蝕本出售，造成企業純利下降甚至虧損。二、另一方面，新接訂單又因原材料價暴跌而令利潤急升，可 惜呢D利潤要到明年第一季才入賬（即聖誕節前交貨嘅訂單蝕本，明年復活節前交貨嘅訂單賺大錢）。三、一般人只睇到製造業今年「失速」，卻睇唔到明年第一季 即將出現嘅純利。基於股價走在經濟之前三到六個月，唔排除工業股股價在今年第四季見底回升！(大家請努力做功課！大家可留意電池市場，電池心好多用日本貨，日元上升會唔會對某D公司有正面作用。又例如LED。)

- 反之，香港、深圳加上澳門及珠海，中國境內四大特區，可合併成一個互通有無嘅超級大都會，能夠提供嘅服務甚至超過倫敦同紐約，成為全球上最多姿多采、最寬、最厚、最有活力嘅大都會。

今日曹sir (2008-12-22)

- 呢次美國採用量化鬆動銀根政策後，道指由11月21日7449.38回升，到底係熊市二期反彈，還是熊市結束？

- 如以移動平均線作為牛熊市分界（已經算係最冇爭議嘅方法），道指必須50天線（依家喺8702點）重返200天線（11062點）之上五個交易天才行。

- 現水平道指只完成最小反彈（接觸50天線），距離確認牛市仍十分遙遠。

- 至於恒生指數今年3月才出現50天線跌破250天線，偏偏就响呢個水平，恒生指數開始反彈並重返250天移動平均數之上。

- 上述行為叫做「吻別」，我老曹今年5月已強調「Sell in May and walk away」，至今50天線再冇重返250天線之上，已證明5月重返250天乃吻別而非牛市重臨。

- 睇見D半桶水專家亂用移動平均線組合，有時真係想笑出嚟，不過無謂教精佢。

- 歐羅之父蒙代爾上周六估計，歐盟將喺明年第三季或第四季復甦；最悲觀係日本。至於中國，應有兩年GDP低增長期，內地房地產最快2010年下半年才能復甦。

- 彭博報道，中國經濟仍在迅速下滑，相信中央好快會推出第二套經濟刺激方案。

- 殊仔宣布批出134億美元畀GM同佳士拿，令佢地多一百零二天壽命，並希望佢地重新商討勞工合約及進行裁員計劃，不然三個多月後便面對破產。

- 响熊市二期只能發掘偏低嘅二線股作炒賣，又係樂趣之一。今年10月至今唔少二線股已回升50％或以上，有D更達100％，例如新濠國際（200），此乃熊市中保持30％資金喺股市中活動嘅樂趣。

- 熊市二期只須分析未來三至六個月前景已經足夠，毋須分析十二個月或以上嘅問題；揀股對象就係未來三至六個月有一定抗跌力嘅股份（或跌幅過大嘅股份），呢D大部分係二線股。至於點樣分辨「山羊」同「綿羊」？便需要經驗同埋智慧。 (你又有冇咁既能力、時間?)

- 至於地產股，到今年11月香港地產股可睇好（因利率下降），內房股仍在分辨龍與鳳（良莠不齊）。

- 熊市二期仍能上升嘅股份，需要：一、良好資產負債表；二、良好現金流；三、抗跌力高；四、擁有別人不能模仿嘅科技；五、有一定派息。

- 2009年將係工業股復甦期（因衰極必盛）。(Foxconn?)

- 去年11月係人家貪心我擔心期，今年11月起就係人家擔心我貪心期。今天各位不應膽怯而不敢承擔風險。喺熊市二期投機，膽識同分析均重要。

- OPEC主席認為油價已見底。

今日曹sir (2008-12-20)

今日(12-26)開始睇番依幾日既曹sir，因為上星期外遊去了。

- 12月19日，周五。恒生指數跌370.30，收15127.51；成交573.8億元。12月期指跌405點，收14995點，低水，後市繼續調整。(期指由17號開始轉淡)

- 滬深三百指數升0.34％，收2052.11。國企指數仍然在8000點之上，技術表現仍佳。

- 油價低於45美元，連沙地阿拉伯亦蝕本；油價低於75美元，則俄羅斯蝕本；委內瑞拉更需125美元才能收支平衡。(但，油價同油股出現背馳，係咪代表油價見底？)

- 去槓桿化繼續把被認為係高風險嘅借款人拒諸門外；加上銀行為增加股本與貸款比率而縮減資產負債結構（變相收縮借貸），並非「量化鬆動銀根」可改變。(Quantitative Easing)

- 日本減息至0.1厘，因經濟迅速惡化，估計2008／09年度GDP收縮0.8%；日圓升至87.141兌1美元。

- 白宮準備讓通用汽車或佳士拿進入有秩序破產，讓它們申請破產保護令，兩公司已宣布暫停生產汽車一個月；相信有秩序地讓兩大汽車集團破產，乃最佳決定。(點解唔賣比日本或中國？有可能破產前，最top既engineer已經被其他車廠邀請過擋)

- 聯儲局拚命減息及放寬信貸，已形成另一泡沫──債券泡沫，一旦爆破，才是福無雙至、禍不單行。

- 假如聯儲局最後一招quantitative easing仍唔奏效，即明年年底美國GDP仍無法恢復增長，咁就係咁先。

- 標普五百及道指在可見將來重新接近今年11月低點嘅機會存在；我老曹堅信現階段只係熊市二期而唔係牛市，唔好妖言惑眾！

- 港人喜歡搵快錢心態，令投資缺乏長遠眼光，應該及早拋棄嘅低端產業至今仍在經營，一場金融海嘯，搞到珠三角工廠人仰馬翻。

- 八十年代之後香港所走嘅路，未必適合2008年後嘅中國；中國只能走上台灣及南韓之路，即透過科技創新去提升人均GDP。

祝大家聖誕快樂

遲jor一日，因為剛剛外遊歸來，anyway，希望大家聖誕及新年快樂！

今日曹sir (2008-12-19)

- 12月18日，周四。恒生指數今天低開高收，收報15497.81，升37.29；成交522.6億元。不過，12月期指跌124點，收15400點，低水。擔心周五港股回落。(今日美股HSBC大跌，幾可肯定港股冇運行。)

- 12月17日中國警告，唔會無限期咁借錢畀美國也，希望美國抓住時機，進行必要嘅經濟改革。詳見《中國日報》。

- 滬深A股近日响1900至2100點窄幅上落，成交較上周減少63％。三條移動平均線已經黏埋一齊，既係壓力亦係支持，相信自11月起A股進入牛皮市。(牛皮市唔係牛市!!)

- 標普五百指數已重返50天線，係另一良好訊號；VIX亦由11月21日高點80回落至家吓52.37，一旦低於50，可令美股進一步上升。我老曹對美股後市繼續抱樂觀態度。(!?)

- 2009年又點？我地面對零利率時代，到時唔少人將從事利差交易，即係借美元揸美債（或美股）。

- 2009年股市仍然唔係樂園，你需要有專業分析能力，才能捕捉每個 up and down。(你要花好多精力去贏錢! 大家記往計自己負出既人力成本。)

- 亞伯達省所有新項目都停工，仲有南非及中國嘅煤變油計劃；南非已停工，中國則仍繼續極可能成為蝕本嘅生意。所有生物燃料計劃亦受威脅，冇人知道未來油價向邊個方向走。Do the Right Thing 真係唔容易。(所謂再生能源，可能又冇之前咁受歡迎，因為油價平~~~)

- 未來十年，Rules of Money 係儲蓄與節約、風險管理，股票市場重返正常水平（再唔係往日嘅賭場），即重返六十、七十年代嘅情況，唔再係1982至2007年咁樣；整個社會甚至全人類都逐漸重返六十年代嗰段 Good Oldies 日子。(個人認為依家先係賭場!!!)

- 因此，明年美元展開新一輪上升浪機會甚大，因為利率已降至0.25厘嘅美元，已無法招架其他貨幣再減息。

今日曹sir (2008-12-18)

- 12月17日，周三。美元減息至接近零，令道指大升4.2％，收8924.14。港股今天高開後出現獲利回吐，全日只升330.31，收 15460.52；成交564億元。12月期指升437點，收15506點；但1月期指升401點，收15482點。從呢點睇，港股正進入消化期。

- 2008年係中國經濟運行由升轉降嘅一年，上述情況受美國及歐洲經濟因素影響，亦係中國結構調整及發展公式轉變所影響，令中國經濟開始步入下行通道，5月份CPI 開始回落（4月份升幅8.5％，11月份僅為2.4％）。

- 作為央行，干預經濟嘅方法除咗利率外，仲有滙率、流動性比率（Liquidity）及資產負債表（Portfolio Balance），從而影響實質利率，達到阻止通縮出現嘅目的。最後能否成功？2009年便知道。我老曹能夠告訴大家嘅係──唔好睇少政府干預嘅能力。

- 美元貶值後，歐羅同英鎊又點應付？佢地減息空間較美元大，如佢地再減息、再貶值去回應美國呢次大幅減息，咁又點辦?! (減息利好乜野可參考羅家聰。)

- 反之石油淨入口國如中國及印度嘅貿易盈餘可大幅上升，同時令CPI回落，帶嚟經濟良性效果。如配合良好財政刺激方案，唔排除內地股市牛市重臨。

- 作為聰明人並唔一定需要牛市去搵錢嘅，好多時上落市更易賺錢。(要係上落市賺錢所花既精力可能比牛市高，例如你要日日睇住個市，依D都係你既成本！)

- 金價又閃閃生輝，但未宜投資，相信金價只喺750至850美元之間上上落落，喺850美元以上又可獲利回吐，預測只係行range。

- 金價與金礦股走勢背馳，你信邊個？我老曹嘅結論係，金價喺850美元之上，並冇投資價值也。

- 依家股市仍對四大壓力：一、Deleveraging；二、Depression；三、Deflation；四、Despair。

- 2009年只要冇乜太壞嘅消息，已經係好消息，因為人人都認為明年經濟極壞，如發現情況冇咁壞，股市已可反彈，因為由去年11月至今年10月恒生指數已回落66％！

- 依家唔叫你信明年好環境，只係想話畀大家知，2009年並冇想像中咁壞。

今日曹sir (2008-12-17)

-12月16日，周二。恒生指數升83.26，收15130.21，成交403.16億元。期指跌45點，收15069點，代表短期股市有回吐壓力。(終於低水！)

- 今次聯儲局減息後，長達九十四年、利用利率去調整經濟嘅手段失效，日後只有向日本銀行學習以「資產負債表」去調控經濟，即不斷向金融體系注入資金。(已經冇息可減！)

- 上述方法2001年日本銀行曾採用，結果令日本經濟2003年4月復甦。

- 周小川話，本月人民幣將減息，明年初利率仍會下降。

- 1945年至今十個熊市中，有九個喺指數反彈20％後牛市重現，唯一一次例外係2001年9月至02年1月。最近標普五百指數由11月20日至12月8日 上升21％又如何？會否一如2001年9月至02年1月嗰次咁，未能引發牛市？客觀分析，美股似進入類似日本嘅失落世代，牛市唔似會响今年11月20日開 始。

- 由1923年至今，美國共有三次為時十年以上嘅牛皮市。2008年11月開始會否第四次出現十年牛皮市？上一個十年以上嘅牛皮市由1966至82年共十六年，然後出現二十五年牛市。

- 今天唔少垃圾債券已有15厘息，有投資級別嘅公司債券亦有8.5厘，應有一定吸引力。

- 美國銀行並唔係單獨例子，唔少大銀行皆須供股，對股價造成嘅壓力極大。金融危機不但未完成，而且更在擴大。

- 最佳入貨期係當基本因素已可支持、技術分析進入極度超賣區之時。(唔好心急！)

- 上述因素(一、曾經係英國殖民地，因此採用英國法（The Rule of Law）。二、外滙自由出入冇管制。三、全球大部分國家人民都可自由出入新加坡同香港。)令香港及新加坡、倫敦、紐約喺金融上接軌，形成環球性金融服務鏈，服務全球金融業。

- 南韓及台灣則冇咁嘅優勢，只有走製造業升級呢條路。

- 中國相信唔可能全國走上金融服務業之路，只能步南韓及台灣後塵，走產業升級路線，才能跨越「中產收入陷阱」。

今日曹sir (2008-12-16)

- 12月15日，周一。恒生指數升288.56，收15046.95；成交426.04億元。12月期指升354點，收15114點，高水，代表後市進一步睇好。

- 11月份入市吸納跌到殘嘅股份，相信可留番1月份獲利回吐，因為12月份唔少職業投資者都需要粉飾櫥窗，努力推高自己揸重股份嘅股價。

- 花旗、高盛、BNP百利達及美國銀行皆預測美元可能進一步轉弱，估計明年見80日圓兌1美元及1.45美元兌1歐羅。

- 內地房地產又如何？過去中國地產市場價格上升可以講史無前例（香港到1980年樓價才1000元一呎；中國改革開放三十年上海樓價已漲上4000到 6000元，有D更見10000元人民幣一呎），恐怕已進入漫長降溫期。11月深圳市長許宗衡表態──一不救市；二不死扛，讓市場自己搵出合理水平。

- 國際金融海嘯下，珠三角似乎成為咗重災區，每天出現民工返鄉潮，令人生懼。倒閉潮9月已開始，依家愈演愈烈，七萬家工廠响珠三角僱用超過一千萬工人，如有四分一關門大吉，受影響工人已達二百五十萬。

- 道理好簡單，控制通脹可用加息；但係要對付通縮，減息作用唔大，即使利率降至零，仍無法阻止價格下跌。價格下跌令企業邊際利潤收窄，當利潤減少或消失，企業價值便下降，必須裁員去減少成本……。

- 踏入2009年，全世界都進入低利率期；經過2008年大跌後，由股票到石油都十分便宜，仍然有錢嘅人會做乜嘢？

- 我老曹相信，如世界經濟復甦，中國應該係第一個站起來嘅國家，各位係咪同意？2009年應該北望神州，返內地找尋投資機會。

今日曹sir (2008-12-15)

- 12月14日，周日。滙豐已向信用卡借貸者提出加息，代表大銀行唔再支持消費者透過信用卡借款增加消費，美國花旗等大銀行亦宣布加息；即全球信用卡貸款進入高息期。

- 恒生指數熊市一期响10月27日結束，道指熊市一期响11月21日結束。(--上周P/E最低見八點八倍，點解我老曹仍認為係熊市二期而唔係三期？By 曹sir 2008-10-14)

- 上周五美元由最高價回落4.7％，兌日圓更見十三年內最低價。上周五全球股市因美國參議院唔批准bailout三大汽車集團而一度大跌，反而美股卻低開高收，聽講過年後另有新方案，即不救、不救還須救！12月係咪美元強勢結束嘅日子？

- 今年我老曹自己亦Down 20％，但冇因此沮喪，仍有勇氣再戰江湖，上月開始又再做Stock-picking。

- 另一投資大師Feldman嘅「Law of Depression Investing」（不景氣投資法）認為，股價如喺低位日子好長而能夠唔破產者，便遲早會上升！

- 經過去年11月至今年10月（十二個月）下跌後，股價肯定十分便宜，問題係明年否會更便宜？便宜唔係買入理由，只有嗰D日後有升值機會嘅股票才值得買！

- 如睇勢，2009年勢頭仍然唔多好，美國樓市泡沫爆破睇落有排都未搞掂。

- Nouriel Roubini認為，美國出現近五十年來最大一次衰退，家吓不但未見底，而且另一泡沫信用卡、企業債券及州政府債券（muni）亦進入爆破期。

- 睇嚟2009年投資者仍要稍安毋躁，炒炒上落市，靜候復甦來臨，最好都係吃喝玩樂為主，2010年再玩過

今日曹 sir (2008-12-13)

- 今天港股再恢復回落，恒指跌855.51，收14758.39；成交587.7億元。12月期指收14760點，跌755點，高水兩點。從呢點睇，下周一 港股可能又再低開高收。各位請記住，11月起係炒上落市，在可見將來不應再出現大跌市，因惡性拋售10月27日已完成，雖然信貸壓碎（credit crunch）仍持續。

- 客觀而言，明年經濟較今年更差，投資方面應集中在香港（或中國），而唔再係西方。

- 唔少人相信全球經濟遲早出現惡性通脹（因美元滙價回落），我老曹只擔心未來進入通縮，原因如下：一、Debt liquidation（減債）；
二、利差交易還原（carry trade減少）；
三、去槓桿化；四、企業利潤率收縮；
五、政府大量介入經濟；
六、失業率上升；
七、消費信心下降；
八、金錢流速下降。
上述八大項目，任何 一項皆可引發通縮，我老曹仍相信日式經濟將在美國登陸。
(- 我老曹相信，美國經濟未來兩年將進入低通脹、低增長期，但唔會出現大蕭條，兩年後有望出現U形走勢。By 曹sir 2008-11-18)

- 7000億美元嘅TARP係用以阻止銀行破產，以免危及存款戶，如美國國會用TARP去阻止其他行業破產，恐怕下一輪破產嘅將係美元，我老曹唔覺得美國失 去汽車業有乜大不了（英國唔係早已失去本土汽車工業嗎？又唔見英國人死晒?!），請唔好再用「失業率」去威脅政府，不然下一次破產將是美元。

- 熊市二期反彈市只適合專業投機者炒賣，例如1929年11月道指亦曾由198點反彈到1930年4月294點，在短短五個月內上升48％。呢次港股由2008年11月上升可維持幾耐仍然木宰羊。

- 去年8月恒指亦只有18000點，如沒有港股直通車消息刺激恒指升上32000點，以及今年9月雷曼兄弟事件將恒指推低至10600多點，恒指合理水平在16800點左右。

- 行業方面，同英、美關係愈少嘅企業，相信愈易站起來。

- 德國財長唔相信亂花費可以挽救經濟，認為只有審慎理財，才能令經濟健康發展。我老曹完全同意德國財長嘅理念。

今晚美國有間大公司會執？

- General Growth Properties NYSE:GGP
大家留意！

http://www.tickerforum.org/cgi-ticker/akcs-www?post=74869

今日曹sir (2008-12-12)

- 12月11日，周四。恒生指數升36.16，收15613.90；成交614.17億元。12月期指跌102點，收15518點，低水，代表恒指喺15781.05遇上阻力。(低水，咁應該後市都係維持15700點水平上落)

- 至今為止，我地玩緊熊市反彈。典型泡沫後嘅反彈維持最長日子係三至六個月，主要係畀大家透吓氣（吊頸都要透氣啦），然後再跌。股票市場有如貓，响吃掉捉到嘅老鼠前必然玩盡它……。此乃熊市二期。

- 過去中國嘅優勢係廉價土地、人力成本低，加上國際產業轉移而發展起嚟嘅勞動密集型產業；依家面對金融危機，低端生產力嘅弱點暴露無遺。(絕對贊同。)

- 如响OECD國家出現上述情況(短債息率下降，長債息率則上升)，代表經濟不久將來會出現衰退。

- 11月21日並冇跌破10月27日低點，應係浪b，依家行浪c（除非完成1、2、3、4、5，才代表熊市喺10月27日死亡）

- 恒指優勢係跌咗三分二之後，即使經濟進一步惡化，股市仍可反彈。喺熊市二期係玩timing而非investing。(即係投機!)

- 代表銀行根本上唔願向工商界貸款，寧可買息率不足1厘嘅國庫券。

- 高盛建議客戶買美國十一個州政府債券信用違約互控（CDS），賭呢D州政府債券違約，無法支付利息。除高盛外，大摩及美林亦建議客戶咁做。

- Oppenheimer銀行分析員Meredith Whitney估計，未來十八個月至三十六個月信用卡公司將收縮信用，令消費者信用額下降。佢估計未來住宅樓價再跌20％，後市令人擔心。

- 不過，上述情況唔會長久，估計明年起美元將再轉弱。

今日曹sir (2008-12-11)

- 12月10日，周三。恒生指數升824.52，收15577.74；成交618.5億元。12月期指升865點，收15620點，高水，代表後市仍向好。(高水43點。重有既上升力度，冇人知，但應該向好。)

- 今年上半年農、礦產品價格上升嘅局面，到7月份起已扭轉過來並迅速回落。

- 美國國家情報委員會日前發表全球趨勢報告預測，未來二十年美國响政治、軍事及經濟嘅主導地位可能減退，但作為全球霸主地位將繼續。

- 反而美國動用7000億美元，只係美國GDP 5％多DD。換言之，响金融海嘯下，其他國家處境較美國更差。(理據會唔會有D牽強?)

- 股市大淡友 Prudent Bear Fund 策略員 David Tice 認為，一旦完成反彈，未來跌幅將達50％，道指可見4450點，佢只睇好貴重金屬如黃金及白銀。

- 債王格羅斯預測熊市三期結束時，道指只有5000點！(到時死得人多，相信依家要儲定錢過冬。)

- 家吓過期三十天而未供嘅樓按已增加6.99％，佔全部供樓物業2.97％，乃二十九年新高。情況喺2009及2010年將進一步惡化。除上述外，市場更要面對Muni-bonds出問題及信用卡壞賬率急升。

- 2007年同1929年距離七十八年，卻冇人提及康狄夫循環周期，唔通呢次先至係堅嘅？(什麼康狄夫循環真係導致1988年股災？)

- 珠三角一帶受工廠停工影響嘅工人有幾多？有人估計春節前有十五萬間工廠停工，一億七千五百萬工人中有幾多人會失業？

- 全球正開始unwind本世紀最大嘅泡沫，有人估計基金業將萎縮50％。

- 呢次唔係普通熊市，而係超級大熊市。唔好誤會熊市已喺今年10月27日結束，結束嘅只係熊市第一期。

- 信各國銀行嘅反應亦將一如日本商業銀行過去做法──買國庫券而非增加借貸，以免呆壞賬急升，形成政府一味發債集資注入銀行系統，銀行則向政府購入國債，D錢並冇流向工商界。

- 美林12月5日嘅研究報告估計，明年全球GDP增長率只有1.3％，係1982年以來最低（半年前預測升2.4％）；但全球經濟有望响2010年復甦，GDP將上升3.1％。睇嚟明年先至係黎明前最黑暗期。

今日曹sir (2008-12-10)

- 2月9日，周二。恒生指數跌291.65，收14753.22；成交569.2億元。12月期指跌323點，收14755點，微微高水，代表今天股市回落只係獲利回吐....(微微高水.....獲利回吐......後市重係睇好？)

- 再以黃金比例計算，最小升幅38.2％，即恒指可見14754點，至今已完成；

- 再睇好一D可上升50％，即見16010點。大市經調整後，能否再升上16000點？冇人可保證。

- 11月21日同RSI形成三浪背馳（我老曹喺當日發出唔好睇得太淡訊號），配合外圍市況，我老曹估計恒指呢次升市止於16010至17273點機會，大於見14754點便掉頭回落。(可以玩多2000點？)

- 相信今年11月起我地正進入小陽春期，到底可維持幾耐無法事前知道。佘當奴好坦白咁告訴香港人，2009年仍係十分困難一年，要到2010年才有機會復甦。

- 人民幣自2005年以來都係單邊升值，今年亦升值13％；就喺奧巴馬認為人民幣應再升值聲中，人民幣偏偏貶畀你睇（毛主席曰：別人反對的我必贊成），以顯示人民幣升貶權响中國，不容美國政府說三道四！

- 人民幣貶值有助出口復甦，因為中國正在開拓俄羅斯、東歐、非洲、南亞等市場，人民幣如追隨美元升值，對中國貨响呢D地區發展極之不利。當全世界貨幣兌美元都貶值時，冇理由要求人民幣升值，對嗎？

- 依家原材料價格及運費大跌令中國貨出口利潤迅速回升，中國出口工業前景突然明朗晒。(? 但需求一樣委縮...........)

- 如能將部分土地分畀農民（將農地轉為可自由買賣），還富於民，中國人消費可以一下子活起來。(賣土地去消費？農民拿了錢又可以點樣維持生計？)

- 中國政府如能還富於民刺激內需，令內地製造業由依賴出口改為服務本土，中國好多問題便可一下子解決矣。

- 1月份金價出現反彈（中國人有買金過農曆年習慣）機會好大。

- 至於油價，我老曹唔認同美林睇25美元一桶論。估計油價喺40美元左右重建基礎，但未來升幅則唔大。

- 第二次反彈係雖然經濟已開始轉壞，但股市超賣（偏離250天線）。

- 換言之，今時今日炒股票乃逆水行舟。在此重申我老曹立場：我老曹不能預測股市短期方向，但大趨勢應可睇得通。

- 依家250天線喺21767點，而且在回落中，即呢次反彈市絕唔可能高出21000點！(大家記往啦！)

今日曹sir (2008-12-9)

- 12月8日，周一。恒生指數升1198.78，收15044.87；成交638.7億元。12月期指收15078點，升1208點，高水，代表後市進一步睇好，估計有力挑戰16800點阻力。

- 2009年鐵礦砂談判重點已非加價加幾多，而係減價減幾多，澳紐銀行估計最少減價50％。(舊年睇好既項目，今年已經轉勢。)

- 中金公司首席經濟學家哈繼銘認為，利率仲要降低108個基點、法定準備金率降250-450個基點，人民幣2009年仍要貶值去刺激出口，相信出口股亦到咗止跌回升期。

- 炒美元強勢資金踏入12月回流股市，因股價已進入短期性偏低期（拋離200天線33％，依家道指200天線喺11244點），因此唔排除道指可重返10000點。

- 經濟實況正在惡化中，但股市因嚴重超賣而反彈，典型熊市二期。

- 恒生指數熊市第一期應喺今年10月27日10676點見底，道指則在今年11月21日7449點見底進入熊二（反彈期）。

- 基於股市走經濟之前，唔排除滬深A股熊市已完成，如滬深A股出現牛市，可令香港呢個寒冬唔太冷。(即係點？反彈定牛市？)

- 明年美國人不但面對高失業率，同時面對信貸被大幅削減。對一個三分二GDP來自消費美國而言，2009年將係十分難度過一年。

- 美國消費者10月份減少消費1％，係2001年衰退以來最大減幅；美國零售業10月份減少2.8％，係1992年以來最大減幅。

- 低質素民主制度在印尼、泰國、菲律賓、印尼及台灣出現，令人再次陷入沉思：到底民主制度係咪真正適合全人類？

今日曹sir (2008-12-8)

- 12月7日，周日。今年十種經常買賣亞洲地區貨幣（唔包括日圓）有九隻下跌，由南韓圜、泰銖、菲律賓披索、印尼盾、林吉特、坡元、新台幣甚至人民幣皆回落，仍能上升者只有港元。

- 依家唔少股票已變成「月下貨」，11月起係撿拾便宜貨時刻，唔少二線股已到咗一蚊一隻雞水平。

- 喺熊市二期，唔少股份可上升50％或以上，都幾好玩；唔似熊市一期大部分日子都係跌，熊市二期係升升跌跌。11月起我老曹正逐步增加投入股市資金。

- 技術上睇，美國樓市調整期只完成一半，美國金融股衰嘢未出齊，但同時唔少值得投資對象卻連沖涼水一齊被潑出街。

- 投資成功或失敗由性格決定，你能否做到當人人貪心之時恐懼、人人恐懼之時貪心（利用VIX指標可知大部分人何時恐懼、何時貪心）？

- 經過兩次繁榮期、兩次衰退期後，長線投資者仍然有損失，你仲相信價值投資法及長線投資必賺？

- 投資大師林治教落：賣出蝕本股、揸住賺錢股（止蝕唔止賺），除非已獲三倍以上利潤！唔好信市場貼士，唔好天天買賣，唔好被低P/E吸引，制訂投資策略然後揀股。

- 隨着對沖基金退出市場，去槓桿化繼續落去，令揸樓作投資人最後亦被迫出售資產，令槓桿進一步受壓抑，無償債能力金融機構破產，部分新興市場甚至出現金融危機。上述將係2009年我地面對問題。

- 亦有人指出，政府為挽救金融機構而大量增加信貸，遲早令貨幣供應上升，最後令美元貶值、金價升上2000美元，而令通脹重臨而非通縮。

- 到底兩種講法邊種可信？

- 另一位專家Millennium Wave Advisors 主席John Mauldlin認為，美元流速在下降，聯儲局並冇製造大量「貨幣」，只係將銀行部分負債貨幣化（monetizing the debt）。即銀行將部分負債向聯儲局換成國庫券，並喺市場拋售換取現金，以應付客戶提款。

- 換言之，聯儲局只提供國庫券而唔係提供現金，聯儲局只增加銀行流動性（liquidity）而非提供現金（cash）。

- 貨幣基礎的確大咗，但貨幣（Money）增長率反由未出事前年率18％增長回落到依家10％，未來不但冇通脹壓力，反而有通縮壓力。

- 此乃我老曹响11月25日金價830美元時曾話中東國家炒錯市背後理由。除上述外，金錢流速（Velocity of Money）亦有關係，例如100美元每月轉手兩次，一年下來便有2400美元交易完成；反之，如100美元每月轉手一次，一年下來便只有1200美元交 易完成。

- GDP等於MV（貨幣供應及貨幣流速結果），貨幣流速下降可令GDP增長率下降而引發通縮。從呢點睇，美元滙價崩潰論基本上唔成立。

- 今年10月27日恒生指數止跌回升，只代表熊市一期完成，而非代表熊市結束；

- 佢唔同意分散投資，而只集中喺少數自己睇好股份身上──佢理論係持有一隻好股較持有十隻壞股強。

今日曹sir (2008-12-5)

- 12月4日，周四。恒生指數跌78.88，收13509.78；成交399億元。12月期指跌25點，收13520點。

- 久違咗嘅揀股唔炒市（stock picking）遊戲又開始。展望未來唔係牛市，而係牛皮市（或熊市二期）。

- 從呢點睇，依家值得投資嘅唔係本港房地產，而係本港地產股。有如用25仙買1元價值嘅東西，日後如你將佢以5角出售，可獲利100％。只要有耐性，長期而言應該可以賺錢

- 10月至今標普五百指數形成下降楔形，加上MACD背馳，短期仍有上升力量，卻冇能力將股市由熊轉牛。

- 除非11月4日低點1606.73失守，不然內地股市應係全球股市中第一個重新站起來嘅股市。(除非..............講真依句說話真係冇意思......)

- 美國十年期政府債券孳息率2.7厘以下（近五十年內最低）；反之，標普五百卻有4厘息。會否一如法興策略員Albert Edwards所估計：美國正步入金融冰河時期？

- 2007年次按危機後信貸壓碎（Credit Crunch）及銀行業大災難（Banking Fiasco），正正就係二十五年前開始滾雪球遊戲嘅死敵。今天遊戲規則再唔係滾雪球，而係雪人開始融化。

- 最近一次衰退由2007年10月30日恒指31958點開始，响美國同中國因素影響下，香港經濟出現V形反彈機會唔大，最終應形係U形經濟（即2007年10月30日回落到08年10月27日後，牛皮一年半載才上升）或更差，仍有待進一步觀察

今日曹sir (2008-12-4)

- 12月3日，周三。恒生指數升182.81，收13588.66；成交379億元。12月期指升307點，收13545點，低水，小心反彈市出現飄忽變幻球（時好時壞）。(有留意開既都知，期指與恒生指數關係唔係咁簡單.....)

- 各位已觀察過台灣式民主、泰國式民主、印度式民主……香港能否發展出「高質素民主」而非「低質素民主」？不然民主都幾得人驚。(係唔係亞洲人都比較唔接受到西式民主?)

- 呢批所謂社會偽尖子或政治企業家，利用自己响法律上嘅知識（或特權），製造一個又一個泡沫，然後從中獲取巨利，最後一走了之，讓整個社會甚至全人類承擔其後果。我老曹佩服、佩服。

- 當全人類都感到不安、沮喪及憂慮之時，突然又彈出一位奧巴馬，大叫change，令失意嘅投資者有如喺深海中抓到一根鹹水草，便以為自己有救，道指自11 月21日起進入The mother of all bear market rallies期，反彈浪一個接一個出現。

- 股市已進入上落市（或長方形走勢），喺上落市中搵食（別人睇淡你睇好，別人睇好你睇淡）並唔容易。

- 請唔好相信「牛市重臨」嘅謬論，因為全球情況仍在惡化，例如加州周一宣布財政進入危急期，如聯邦政府唔出手，加州政府可能破產。

- 2000年3月24日至08年12月2日止標普五百下跌45％，平均每年失去3.8％價值。邊個話長線投資實賺?!

- Meredith Whitney認為，未來十八個月信用卡公司將減少持卡人信貸2萬億美元，令信用卡持有人可獲得嘅流動資金減少45％，信用卡貸款利率亦將大幅上升。

- 近月邁阿密嗰D空置物業已被無家可歸嘅人入侵，情況變得複雜。為阻止「無殼蝸牛」入侵，銀行決定對斷供者實行唔收樓，繼續等佢地住落去，以免被「無殼蝸 牛」入侵，便趕都趕唔走；結果愈來愈多家庭索性唔供樓。唔少租出去嘅物業，租客亦索性唔交租，等業主收樓（業主亦唔敢收樓，因為一旦空置更加麻煩）。(太多有錢人係窮人身上搵錢，窮人人數急升，窮人變得愈惡，到頭來要搵番有錢人算賬！一個社會點樣處理窮人，係好好既課題。)

- 不景氣已由住宅擴展到商場及寫字樓。換言之，美國房地產市場回落情況不但未有改善，反而正在擴散，甚至酒店股亦大幅滑落。

- 呢次上天真係憤怒嘞，佢決定懲罰社會上嘅偽尖子及政治企業家，唔再容許類似AIG七十位公司嘅高層人員到加州度假，佢地除咗享用私人飛機外，亦用掉422000美元；

- 公平去咗邊度?!政府不斷向納稅人借錢，然後送畀華爾街大鱷，因為呢D大鱷食唔飽可令整個金融系統崩潰云云。如果咁樣可以解決眼前問題，就真係天冇眼。

- 今年11月起股市因超賣而進入反彈期，但經濟繼續惡化，呢段青黃不接期可維持幾耐？1929至32年期間亦出現過唔少反彈，有D升幅達到40％。

- 反彈市係最難捕捉嘅，一般散戶都處理得唔好。

- 點解有反彈？因投資者仍念念不忘2007年10月11日道指14198點。

- 人口中最慘係三十歲到四十歲，呢批人口喺美國約七千萬人，佢地响1967至77年出生，喺九十年代及2000年進入社會做事，成為貴價樓嘅買家，但去年開始步入負資產，未來十年到二十年點可以依賴佢地消費去支持經濟？(感同身受)

- 何謂「去槓桿化」？用普通人明解嘅文字寫，就係被迫斬倉。踏入今年11月，被迫斬倉已經完成，但投資者已冇蚊年再炒上。(例如依家個市好靜....)

今日曹sir (2008-12-3)

- 12月2日，周二。恒指跌702.99，收13405.85；成交385億元。

- 12月期指跌632點，收13238點，仍然低水。(依然低水，後市好淡爭持？)

- 羅傑斯又一次睇錯市，美元未真正轉弱，金價亦未真正轉強。如果佢响接受彭博新聞訪問時真係拋出手上美元買金，就係又一次高價接金！

- 12月15、16日係美元今年最後一次減息，英鎊估計亦將減息半厘，而歐羅在明年年中前仍不斷減息，澳元今天則減息1厘。從呢點睇，美元強勢最低限度可維持到2009年年中。(各位唔洗咁快買金，曹sir睇金幾準..)

- 佢(哈佛教授Jeffsey Frankel)唔認為美國經濟可於明年年中復甦（根據11月份華爾街所作嘅調查，唔少分析員認為明年第一季經濟可復甦，依家改口為第二季），理由係前擴張期共七十三個月，於2007年12月結束，乃戰後最短嘅繁榮期，未來衰退期會較長。

- 如重返1871至1995年，平均P/E水平，未來跌幅唔算大；但如重返三大超級熊市嘅P/E，未來跌幅仍十分大【圖】

-中國政府宣布動用30億美元購入一百萬噸基本金屬，以協助內地礦業，因為價錢已大幅回落；

- 由10月27日恒生指數由10676點開始上升，相信只係熊市二期反彈。(重係熊市二期！)

- 去年11月開始，投資策略不但要強調持盈保泰，同時要學習點樣在熊市中生存（活着就是唯一真理）。

- 點解？一如我老曹曾提出點解買滙控（005）股份收息較存款入滙豐銀行更多，答案係滙控股價將回落，因為滙控有可能減派息或供股。

- 標普五百指數合理價880點，即股市已開始進入偏低期；至於偏低幾多才見底，只能做事後孔明（偏低並唔係入市理由）。

- 現水平既唔係1932年亦非1974年極偏低期，因美股已回落50％（港股10月27日止更回落三分二）。未來日子將出現大量反彈，升幅可由20％到50％，但要認清楚只係反彈。我老曹在11月21日（較畢巴頓更早）已指出股市將出現大反彈，昨天再指出大反彈完成

- 港股10月27日、美股11月21日經惡性拋售後，仍無法出現牛市，有四大理由：

一、去槓桿化（Deleveraging）仍在進行。
二、企業純利 回落，銀行失去出售衍生產品嘅收入，令利潤永久減少34％；地產公司無法再利用重估資產產生利潤，令2009年純利減少40％。
三、通縮壓力，為減少負債 令產品及服務業收費下降，產生負財富效應。
四、失望。去年10月過分樂觀估計的投資者，今年十分失望，擔心明年更進入絕望期。

- 換言之，在滙控股價未見底前，恒生指數亦難見底。

- 各位請坐定定！恐怕中國呢隻火鳳凰未能在明年重生，經濟轉型亦未能完成，中國企業將面對困難時期。

今日曹sir (2008-12-2)

- 12月1日，周一。恒生指數升220.6，收14108.84；成交439.2億元。12月期指收13870點，跌118點，低水，擔心反彈市又告完成。(上星期六睇好，今日則睇淡。所以依個指標只可作一日參考)

- 日本嘅例子，令美國聯儲局極之擔心美國將步九十年代日本嘅後塵，此乃2001年1月至03年中美國大幅減息嘅理由。

- 美國第三季GDP下降0.5％，聯儲局估計明年首六個月GDP仍下降。

-十年前OPEC無力阻止油價跌至10美元，今年11月29日開羅會議又能否阻止油價進一步下滑？

- 如美林估計正確，明年將出現二十五年內首次石油消耗減少，OPEC必須大幅減產，才能阻止油價低於50美元。(另一角度睇其實對地球有幫助)

- 今年5月殊仔嘅1500億美元刺激經濟計劃，成效如何？可以講「nothing」！既冇解決房屋財政失敗嘅問題，亦冇解決銀行資本充足比率不足問題，更加 未能阻止美國GDP出現負增長。唯一成功係將原本5月份開始嘅衰退延遲到7月份，令美國暫時未出現連續兩季GDP負增長。

- 政治家利用各種理由去浪費納稅人嘅金錢，並令公眾人士誤以為佢地正在挽救經濟（其實係令情況惡化）。

- Thomson路透估計，11月份失去工作崗位人數達三十萬，係2001年10月後最多嘅一個月（失去三十二萬五千工作崗位）。Thomson路透估計，高潮係明年1月，將有三十四萬五千人失去工作崗位

- 換言之，內地房地產今年第三季亦進入回落潮。

今日曹sir (2008-12-1)

- 11月30日，周日。感恩節過後，開始踏足今年最後一個月。

- 今年美國「黑色星期五」令人失望，實現銷售額100億美元，較去年同期升3％（去年較2006年升8.3％），但如扣除通脹因素，零售額升幅其實接近零。(出口寒冬未過？)

- 今年11月起，假設未來經濟係U形反彈，即股市進入上落市，相信10月27日恒指10676點短期有得守。如去年11月開始你做空軍（go short），便應該响今年11月平倉。

- 雷曼事件後明白怪責別人並冇用，虧損仍由自己承擔，如你唔從自己失敗中吸取教訓，你永遠係一位失敗者。

- 標普五百响11月21日最低見741點，較去年10月最高指數1576點回落53％，係過去六十年內十六個熊市中跌幅最大；但有七個熊市時間較呢個長，亦有五個熊市P/E較呢次以2007年純利計P/E八點七倍為低。

- 反之，2008年11月21日標普五百如以2008年估計純利計，P/E仍高達十二倍。從呢點睇，今年11月21日標普五百指數低點只係一個「中期低點」，唔代表熊市結束，

- 有理由相信，美股仍可反覆回落到2009年5月或6月甚至更遠。

- 相信呢次道指由2008年11月21日7449點開始上升，亦只係另一次大反彈，而非熊市結束，超級熊市一期11月21日結束，依家正進入漫長熊市二期。

- 經過金融海嘯後，全球監管機構都認為應該加強「regulate」；政治家則認為最好向過去高薪者攞「tax」；投資者更認為應該「吊死」佢地。响咁形勢下，你信唔信明年股市可大升？

- 投資者被鞭打後，雖然酷刑已停止，卻進入痛定思痛期。今次反覆向上趨勢到底12月中美國宣布減息半厘後結束，抑或明年1月奧巴馬上台前後結束？木宰羊。

- 金融海嘯已經停止，但滿目瘡痍、百廢待舉，加上另一計時炸彈已經開始計時，佢就係美元！

- 如金價升穿850美元，將係美元麻煩開始。11月金價上升唔係因為通脹，而係投資者對貨幣唔信任。

- 瑞信估計明年年底前香港住宅價格仲有30％下跌空間，因未來兩季失業率大幅上升。我老曹唔同意上述分析，因為經過1997至2003年教訓，香港居民炒樓虧損極大，呢次樓市牛市以自住為主，投資客並唔多。